Faxriylarga ehtirom ko‘rsatildi
Azaldan makon va zamon, olam va odam, inson va jamiyat
o‘rtasidagi munosabatlarni shakllantirishga, avlodlar davomiyligini, insoniyat kamolotini
ta’minlashga xizmat qiluvchi ezgu tushunchalar silsilasida muallimlik rutbasi doim
yuksak va qadrli bo‘lib kelgan.
1-oktabr - O‘qituvchi va murabbiylar kuni munosabati
bilan ichki ishlar organlarida xizmat qilib, bugun keksalik gashtini surayotgan faxriylar viloyat Ichki ishlar boshqarmasi jamoasi tomonidan
samimiy muborakbod etildi.
Dastlab faxriylar Samarqandning diqqatga sazovor maskanlariga sayohat qilishdi.
Samarqand shahridagi muhtasham bazmgohda tashkil etilgan bayram tadbiriga uzoq yillar
ichki ishlar organlarida faoliyat olib borgan soha faxriylari taklif etilib, ularning
fidokorona mehnatlari e’tirof etildi. Ularga
Vazirlik rahbariyatining bayram tabrigini ham yetkazdi. Shuningdek, Ichki ishlar
vazirining buyrug‘i bilan taqdirlangan faxriylarga mukofotlar tantanali ravishda
topshirildi.
Bir piyola choy ustida kechgan bayram doirasida faxriylar o‘z ishlagan davrlarini
eslab, tengdoshlari bilan dildan suhbat qurishdi.
Xushovoz xonandalarning diltortar qo‘shiqlari, jozibali raqslar barchaga ko‘tarinki kayfiyat ulashdi.
