"Xavfsiz hayot uchun birlashaylik!" shiori ostida marafon o`tkazildi
“Xavfsiz hayot uchun birlashaylik!” Bu shior bugun sportsevar
yoshlar va barcha ko‘ngillilarni bir manzilga chorladi.
Jismoniy faollik, sport bilan muntazam shug‘ullanish
sog‘lom va baxtli hayot kechirishning asosi. U bilan doimiy shug‘ullanish sog‘lom turmush tarzini
ta’minlash bilan birga, ruhiy tetiklik bag‘ishlaydi va immunitetni yaxshilaydi.
Marafon ishtirokchilari startdan finishgacha masofani davom ettirib, sportga nechog‘lik
oshnoligini va yaxshi natija ko‘rsatishga harakat qilishdi. Marafonda bir-biridan
o‘zishga, chopqirlikda faol bo‘lishga intilganlar yagona maqsad sari, g‘oliblik
uchun finishga oshiqdilar. Harbiy orkestr sadolari, maxsus
texnikalar paradi marafon ishtirokchilari qalbini sururga to‘ldirib, g‘alaba sari
ruhlantirdi.
Olimlarning ta’kidlashicha,
har kuni 5 daqiqa yugurgan odamda yurak-qon tomir kasalligi xavfi yo‘qoladi. Shu
sababli ular orasida uzoq umr ko‘ruvchilar soni ko‘p bo‘ladi. Muntazam tongda yugurish
o‘rta hisobda inson umrini 3 yilga uzaytirar ekan.
Yurish,
yugurish, jismoniy tarbiya, sport. Bular qanday atalishidan qat’iy nazar yagona
g‘oya – sog‘lom turmush tarzini targ‘ib qiladi va tub zamirida insonlarni salomatlikka
chorlaydi. Marafon ishtirokchilari
yoshlik zavqi, jo‘shqin g‘ayrat-shijoati ila do‘stona raqobat bilan marra sari ildamlik,
chaqqonlik va tezkorlik ko‘rsatishdi.
Yugurish marafoni xushmanzara va ko‘rkam
yashillikka tutash hududda tashkil etilganligi ishtirokchilarga tabiatdan zavq olib,
toza havodan bahra olishini ta’minladi.
Nihoyat,
hayajonli va hal qiluvchi daqiqalar. Yugurish marafonida finishga birinchilardan
bo‘lib yetib kelgan g‘olib ishtirokchilar tantanali tarzda taqdirlandi.
Aytish joizki, mazkur musobaqa aholi orasida sog‘lom turmush tamoyillarini keng
yoyish, yoshlarni bir maqsad atrofida birlashtirish va jipslashtirishga, shuningdek,
yildan-yilga ommaviylashib borayotgan salomatlik tadbirlarining darajasini yuksaltirishga
xizmat qilishi bilan ahamiyatli bo‘ldi.
Umida
Mamadalieva
