Ichki ishlar organlarida “oila kuni” e’lon qilindi
Oila jamiyatimizning kichik bir bo‘g‘ini, xalqimizning
milliy an’analarini o‘zida saqlovchi mo‘jaz maskan. Ezguliklar oiladan boshlanadi.
Oilada sog‘lom ma’naviy muhitni qaror toptirish, xususan oilaviy munosabatlarda
o‘zaro hurmat, mehr-oqibat ruhida bo‘lishiga erishish milliy qadriyatlarimizdan
hisoblanadi. Baxt qo‘rg‘oni mustahkam bo‘lsa, unda ma’naviyat ildizlari
teran, farzandlar barkamol, urf-odatlar bardavom bo‘ladi. Jamiyatda har tomonlama
sog‘lom muhitni qaror toptirish hamda istiqbolli barkamol avlodni voyaga yetkazishni
mustahkam oila poydevorisiz tasavvur qilib bo‘lmaydi. Aholining turmush farovonligi, insonning o‘zini baxtli his qilishi
oilada ro‘yobga chiqadi. Shunga muvofiq, Samarqand shahar ichki ishlar organlari
faoliyatini muvofiqlashtirish boshqarmasi tomonidan ichki ishlar organlarida
23-24-25 fevral kunlari “oila kuni” deb e’lon qilindi. Yaratilgan bu imkoniyatdan
barcha xodimlar unumli foydalanib, kunni oilasi bilan madaniy hordiq olishga bag‘ishlashdi.
Kino, teatr tomoshalari, konsert dasturlari, istirohat bog‘lari, muzeylarga sayohat
tashkil qilindi. Farzandlar bilan do‘stona suhbat, o‘zaro dam olish oilaviy rishtalarni
yanada mustahkamlashda ijobiy ahamiyat kasb etdi.
-Oila-muqaddas. Baxtli hayotga
erishish insoniyatning orzusi, bu istaklar esa muqaddas qo‘rg‘on- oila bilan chambarchas
bog‘liq. Oilada ulg‘ayayotgan o‘g‘il-qizlar
kelajagi, ularning baxtiyorligida muhitning ta’siri katta. Er-xotin o‘zaro hammaslak
bo‘lsa, farzandlar bilan do‘stona muloqotda bo‘lsa bu oilada xotirjamlik, turmushda
farovonlikni ta’minlaydi. Bilasiz, ichki ishlar organlari xodimlari zimmalaridagi
mas’uliyatni ado etish uchun kunu tun xalqimiz xizmatida. Oilasiga vaqt ajratishi
doim ham ko‘ngildagidek bo‘lmasligi mumkin.
O‘tkazilgan “oila kuni” tadbirlari ayni ana shu maqsadlarga qaratilgan. Endilikda
buni doimiy an’anaga aylantirish rejalashtirilgan, -deydi IIO FMB boshlig‘i o‘rinbosari
Jamshid Qobulov.
Bu kabi tadbirlar oilada ota-ona va farzandlar o‘rtasidagi
hamjihatlikni, o‘zaro munosabatlarni yaxshilashga katta zamin yaratishi bilan ahamiyatlidir.
“Oila kuni”ni ommalashtirish esa birdamlik, ahillik, sog‘lom va mustahkam oilani
ta’minlash demakdir.
Umida
Mamadalieva
