26 Fevral 2024 yil 1604

Samarqand shahri bo‘yicha Ichki ishlar organlari faoliyatini muvofiqlashtirish boshqarmasida ko‘rgazmali seminar mashg‘uloti o‘tkazildi

Samarqand shahri bo‘yicha Ichki ishlar organlari faoliyatini muvofiqlashtirish boshqarmasida ko‘rgazmali seminar mashg‘uloti o‘tkazildi. Mazkur seminar Samarqand shahri bo‘yicha IIO FMB rahbar-xodimlari tomonidan kun davomida amalga oshiriladigan ishlariga bag‘ishlandi.

Mazkur yo‘nalishdagi ilk bor, eksperiment tariqasida o‘tkazilayotgan seminarda dastlab boshqarma tashkiliy bo‘limi boshlig‘i so‘z olib, ushbu tadbirning mazmun-mohiyati haqida to‘xtalib o‘tdi.

Bugun Samarqand shahri IIO FMB tasarrufida 9 ta IIBo‘limlari mavjud bo‘lib, shaxsiy tarkib va kuch-vositalar tun-u kun xizmat olib borishadi.

Tashkiliy bo‘limga tegishli xizmatlar tomonidan sutka davomida olingan tezkor ma’lumotlar, “Tungi xizmat”ga jalb qilingan shaxsiy tarkib tomonidan amalga oshirilgan ishlar, qayd etilgan jinoyat va hodisalar rahbarga muntazam ravishda yetkaziladi. Bunda zamonaviy texnologiyalardan foydalanish ham muhim o‘rin tutishi aytib o‘tildi.

Shundan so‘ng boshqarma HPBo‘limi boshlig‘i so‘z olib, hududlardagi kriminogen vaziyat haqida axborot berdi. Qizil hududlarni sariq yoki yashil toifaga o‘tkazilishida amaliyotda qo‘llanilgan tajribalari bilan o‘rtoqlashdi. Jinoyat va huquqbuzarliklarning oldini olishda mahalla yettiligi bilan olib borilgan profilaktik jarayonlar misollar yordamida tushuntirib berildi. “Profilaktika kuni” rejasida hafta davomida sodir etilgan jinoyat va huquqbuzarliklar IIBo‘limlari kesimida tahlil qilinadi.

Seminarda YPXning faoliyati ham o‘rganildi. YTHning oldini olish va kamaytirish uchun qilingan ishlar, ularning samaradorligi xususida bo‘lim boshlig‘ining axboroti tinglandi. Yo‘llarda xavfsizlikni ta’minlash, tirbandliklarni kamaytirish, harakat xavfsizligiga e’tibor qaratish bosh maqsad ekanligi ta’kidlandi. Shahardagi kuzatuv kameralari va tezlikni cheklovchi radarlarning ahamiyati va foydali jihatlari barcha ishtirokchilarga tushuntirildi.

Tadbirda boshqarma boshlig‘i ham so‘z olib, o‘zining kunlik ish faoliyati bilan o‘rtoqlashdi. Rahbar xizmat jarayoni borasida har bir jihatga e’tibor qaratar ekan, “Jismoniy va yuridik shaxslar” tomonidan yo‘llangan murojaatlar hech vaqt e’tibordan chetda qolmasligini ta’kidlab o‘tdi. Har bir murojaat yuzasidan tegishli sohaviy xizmatlarga ijobiy hal etilishi bo‘yicha ko‘rsatmalar beriladi. Bu bo‘yicha kunlik bajarilgan ishlar Samarqand shahar So‘g‘diyona maskanida joylashgan 3-sektor shtabida muhokama etilishi ham aytib o‘tildi.

Shuningdek, “Tungi xizmat”ga jalb qilingan rahbar va xodimlarning xizmat olib borish jarayonlarini nazorat qilish, xizmatning sifat darajasini oshirish maqsadida hamda sutka davomida sodir bo‘lgan jinoyatlarni issiq izidan fosh etilishini ta’minlashga ham asosiy e’tibor qaratilayotganligi ta’kidlab o‘tildi.

Ko‘rgazmali seminar ishtirokchilari Samarqand shahri bo‘yicha IIO FMBda xodimlarning xizmat olib borishi uchun yaratilgan sharoitlar bilan ham tanishishdi.

Samarqand shahrining Qorasuv maskanida joylashgan 9-son IIBo‘limi ko‘p ming sonli aholiga xizmat ko‘rsatadi. Bu yerda fuqarolar xavfsizligini ta’minlash va osoyishtalikni saqlashga alohida e’tibor qaratilib, bo‘lim binosi zamonaviy asbob uskunalar bilan jihozlangan. Markazga integratsiya qilingan kuzatuv kameralari orqali ko‘plab jinoyat va huquqbuzarliklarning oldi olinadi.

Samarqand shahri miqyosida “Xavfsiz shahar”, “Xavfsiz hudud”, qolaversa yo‘l transporti bilan bog‘liq hodisalarni oldini olish maqsadida sohaviy xizmatlar bilan hamkorlikda, “Diqqat piyoda”, “Xavfsiz yo‘l” tadbirlari muntazam ravishda olib borilishi ham seminar davomida ta’kidlab o‘tildi.

Mazkur seminardan ko‘zlangan maqsad, bugun davlat idoralari bilan xalq o‘rtasidagi munosabatlarning yaqin va uyg‘unligi, har bir holatga adolatli va shaffof yondashish, eng asosiysi xalq bilan birga, yonma-yon bo‘lib xizmat olib borish kabi ezgu maqsadlar mujassam.

Axborot xizmati

Text to speech