1600 АҚШ доллари эвазига жарима майдончасидаги машинани чиқариб беришни айтган шахс ушланди
2022 йил 20 октябрь куни ИИВ ШХББ Самарқанд вилояти бўйича бошқармасига фуқаро ариза билан мурожаат қилиб, унда 2022 йил 16 октябрь куни соат 17:00 ларда, тахминан спиртли ичимлик истеъмол қилиб, ўзига тегишли бўлган “Нексия-3” русумли автомашинасини Самарқанд шаҳар Рудакий кўчасида бошқариб бораётганида ЙПХ инспекторлари уни алкотестердан ўтгазганларида спиртли ичимлик истеъмол қилганлиги аниқланганлиги сабабли, унга нисбатан маъмурий баённома расмийлаштириб, автомашинани жарима майдончасига қўйганликларини, шундан сўнг, у автомашинани жарима майдончасидан чиқаришга ҳаракат қилиб юрганида, “Б” исмли шахс ушбу ишни ҳал қилишда ёрдам бериши айтиб, у билан гаплашганида, Самарқанд вилояти ИИБ ЙҲХБда ишловчи танишлари орқали унга нисбатан чора кўрилмаслик, ишини ижобий ҳал қилиб бериши мумкинлигини, яъни унга нисбатан тузилган маъмурий баённомани судга юбормасдан ҳайдовчилик гувоҳномасини олиб бериб, транспорт воситасини жарима майдончасидан чиқариб беришини айтиб, 1.600 АҚШ доллари миқдордаги пулларни беришни талаб қилиб келаётганини, ушбу фуқарога нисбатан қонуний чора кўришни сўраган.
Мазкур ариза юзасидан 2022 йил 20 октябрь куни ИИВ ШХББ Самарқанд вилояти бўйича бошқармаси тезкор ходимлари томонидан ўтказилган тезкор тадбир давомида, фуқаро Қ.Б. ариза муаллифидан 1.600 АҚШ доллари миқдоридаги пулларни олган вақтида ушланиб, ҳужжатлаштирилган.
Мазкур ҳолат юзасидан Самарқанд вилояти ИИБ ҳузуридаги Тергов бошқармаси томонидан терговга қадар текширув ҳаракатлари олиб борилмоқда.
Самарқанд вилояти ИИБ Ахборот хизмати
