Самарқанд вилоятида ички ишлар органлари томонидан аҳоли билан яқин мулоқотни таъминлаш, фуқароларнинг муаммоларини жойида ҳал этиш мақсадида навбатдаги очиқ қабул ташкил этилди.

Вилоят Ички ишлар бошқармаси бошлиғи, полковник Раҳмат Маматов раҳбарлигида ўтказилган қабулда ўттиздан ортиқ фуқаролар ўзларини қийнаётган муаммолар, шу жумладан, жиноятчиликка қарши кураш, жамоат хавфсизлигини таъминлаш, ёшлар ўртасида ҳуқуқбузарликларнинг олдини олиш, иш билан таъминлаш каби муҳим ижтимоий масалалар юзасидан мурожаат қилди.

Қабул давомида фуқаролар томонидан оилалардаги низолар, фирибгарлик ҳолатлари ва бошқа турли ҳаётий муаммолар ҳам кўтарилди. Ушбу масалалар ҳар томонлама муҳокама қилинди ва уларнинг ечими бўйича тегишли мутасаддиларга аниқ топшириқлар берилди.

Таъкидлаш жоиз, айрим масалалар фуқароларни қабул қилиш жараёнининг ўзидаёқ ижобий ҳал этилди. Мутахассислардан иборат ишчи гуруҳлар томонидан жойларга чиқилган ҳолда муаммоларни ўрганиш ва тезкор чора кўриш амалиёти йўлга қўйилди.

Ички ишлар органлари раҳбариятининг бу каби очиқ мулоқотлари аҳоли билан ишлашда янги босқични бошлаб бермоқда. Бу эса ҳуқуқни муҳофаза қилиш тизимига бўлган ишончни мустаҳкамлашда муҳим омил сифатида баҳоланмоқда.